Հաճախ տրվող հարցեր

Նախ՝ ուշադիր կարդացեք նկարագրությունը, այնտեղ նշված է ինչպես ներկայացվող տվյալների, այնպես էլ հայտի ուսումնասիրման գործընթացի և ժամկետների վերաբերյալ տեղեկատվություն։ Այնուհետև՝

• Սեղմեք «Դիմել առցանց» կոճակը և մուտք գործեք «Ես Եմ» նույնականացման հարթակի միջոցով՝ ընտրելով նույնականացման առաջարկվող տարբերակներից մեկը։
• Լրացրեք պահանջվող տվյալները։
• Ստուգեք տվյալները, համոզվեք, որ լրացված տվյալներում չկան վրիպակներ/թերություններ, իսկ առկայության դեպքում՝ խմբագրեք դրանք։
• Սեղմեք «Հանձնել դիմումը» կոճակը և կտեսնեք դիմումը հաջողությամբ ուղարկելու մասին հաղորդագրություն։

Հայտի առաջին էջում՝ «Դիմողի տվյալներ» հատվածում Դուք տրամադրում եք կապի հետևյալ միջոցները՝ հեռախոսահամար և էլ․փոստի հասցե։ Միաժամանակ, հարթակի անձնական էջի «Դիմումներ» բաժնում կտեսնեք հայտի կարգավիճակի փոփոխությունները։ Հետևեք էլ․փոստի նամակներին՝ հայտի կարգավիճակի փոփոխությունների մասին ծանուցումները բաց չթողնելու համար և ուշադիր եղեք, քանի որ դրանք կարող են ենթադրել Ձեր կողմից ործողություն, օրինակ՝ խմբագրել հայտը։

Պետական գրանցման կամ պետական հաշվառման համար դիմած անձի կողմից ներկայացված տեղեկատվությունը գործակալությունը համարում է արժանահավատ։ Անձանց կողմից գործակալություն ներկայացված տեղեկատվությունը կարող է համարվել անարժանահավատ, եթե կա դա փաստող կամ այլ անձանց ներկայացրած տեղեկատվություն։ Գործակալությունը ներկայացվող տեղեկությունների ճշտության ստուգում չի իրականացնում և պատասխանատվություն չի կրում դրա հետևանքով առաջացած հնարավոր որևէ վնասի համար։ Դիմող անձը Հայաստանի Հանրապետության օրենսդրությամբ սահմանված կարգով պատասխանատվություն է կրում սխալ տեղեկատվություն տրամադրելու, ինչպես նաև իր տրամադրած սխալ տեղեկատվության հետևանքով առաջացած վնասի համար։

Բիզնեսի տեսակը որոշելուց հետո հաջորդ քայլը բիզնեսի գրանցումն է։ Բիզնեսը գրանցելու համար նախ անհրաժեշտ է ընտրել դրա կազմակերպաիրավական ձևը, որից էլ կախված է լինելու հետագայում բիզնեսի համար վճարվող հարկատեսակները, մասնակիցների ընտրությունը, նրանց իրավունքներն ու պարտականությունները, բիզնեսի գործունեության սահմաններն ու հնարավորությունները։

Գործակալությունը միասնական պետական գրանցամատյանում գրառում է միայն սահմանափակ պատասխանատվությամբ ընկերությունների մասնակիցների վերաբերյալ տեղեկություններ։ Բաժնետիրական ընկերությունների ռեեստր գործակալությունը չի վարում։ Առևտրային կոոպերատիվների անդամների վերաբերյալ տեղեկություններ միասնական պետական գրանցամատյանում չեն գրառվում։

Հայաստանում բիզնեսը հնարավոր է գրանցել ինչպես առցանց եղանակով, այնպես էլ ֆիզիկապես։

• Առցանց եղանակով այժմ հնարավոր է գրանցել միայն ԱՁ և ՍՊԸ, եթե գրանցողն ունի նույնականացման քարտ և թվային ստորագրություն։
• Ֆիզիկապես բիզնես գրանցել կարող են բոլորը, այդ թվում՝ օտարերկրյա քաղաքացիները։

Բիզնեսը գրանցելու համար անհրաժեշտ է դիմել՝

• Իրավաբանական անձանց պետական ռեգիստրի գործակալություն (ք. Երևան, Կոմիտաս 49/3, Վազգեն Սարգսյան 3),
• Իրավաբանական անձանց պետական ռեգիստրի գործակալության տարածքային գրասենյակներ,
• ՀՀ-ում գործող բանկեր (նախքան դիմելը անհրաժեշտ է բանկից ճշտել՝ արդյոք տվյալ բանկը իրականացնում է այդ գործառույթը),
• Հայփոստի մասնաճյուղեր։

Առևտրային կազմակերպությունների գրանցումը տևում է՝

• 1 աշխատանքային օր, եթե հիմնադիրները ֆիզիկական անձինք են և չեն օգտվում օրենքով նախատեսված փաստաթղթերի նմուշային ձևերից,
• 2 աշխատանքային օր, եթե հիմնադիրների թվում կա իրավաբանական անձ, և նրանք չեն օգտվում օրենքով նախատեսված փաստաթղթերի նմուշային ձևերից,
• գրանցվում է անմիջապես, եթե գրանցող անձը փաստաթղթերը իրավաբանական անձանց պետական ռեգիստրի գործակալություն ներկայացնելիս օգտվում է օրենքով նախատեսված փաստաթղթերի նմուշային ձևերից։

Հիմնադիրներից պահանջվող տվյալները կարող են տարբերվել՝ կախված նրանց քաղաքացիությունից և ֆիզիկական կամ իրավաբանական անձ լինելու հանգամանքից։

ՀՀ քաղաքացի լինելու դեպքում հիմնադիրը պետք է ներկայացնի՝

• անձնագիր կամ նույնականցման քարտ,
• հանրային ծառայությունների համարանիշ։

ՀՀ քաղաքացի չլինելու դեպքում հիմնադիրը պետք է ներկայացնի՝

• անձը հաստատող փաստաթղթի պատճենը՝ նոտարական հաստատմամբ հայերեն թարգմանությամբ, հանրային ծառայությունների համարանիշ։

Եթե հիմնադիրը ՀՀ-ում գրանցված իրավաբանական անձ է, պետք է ներկայացվի՝

իրավաբանական անձի կառավարման լիազորված մարմնի համապատասխան որոշումը նոր իրավաբանական անձ հիմնադրելու մասին և հիմնադիր իրավաբանական անձի անվանումն ու պետական գրանցման համարը:

Եթե հիմնադիրը օտարերկրյա իրավաբանական անձ է, պետք է ներկայացվի՝

իրավաբանական անձի կառավարման լիազորված մարմնի համապատասխան որոշումը նոր իրավաբանական անձ հիմնադրելու մասին, իրավաբանական անձի անվանումը և պետական գրանցման համարը։ Բոլոր փաստաթղթերը պետք է թարգմանված լինեն հայերեն՝ նոտարական վավերացմամբ։